Мицкоски на средба со коалициските партнери: Никој нема право да им наложува на граѓаните како да постапуваат

Макфакс

12/09/2018

19:13

709

Големина на фонт

а а а

Претседателот на ВМРО-ДПМНЕ, Христијан Мицкоски, се сретна со партнерите од коалицијата „За подобра Македонија“. Како што соопштија од партијата, на средбата се разговарало за актуелните политички случувања, капитулантскиот договор со Грција, претстојниот референдум за промена на името и корупциските афери и скандали на власта, односно масовниот грабеж што се одвива зад сцената.

„Коалицијата ‘За подобра Македонија’ го потврди ставот дека не може да се согласи со капитулантскиот договор со кој се бришат името, јазикот и идентитетот на државата.

Претседателот Мицкоски на коалициските партнери им го соопшти ставот на партијата кој се базира на достоинството и разумот на граѓаните, сами да одлучат како ќе постапат на 30 септември. Ниту СДСМ, ниту ВМРО ДПМНЕ имаат право да им наложуваат на граѓаните како да постапат по едно вакво историско прашање од кое не зависи само иднината на сегашните, туку и на идните генерации. Само политичари кои се длабоко навлезени во криминал и кои знаат дека народот ги прочитал и очекува да си заминат би се плашеле од давање доверба на граѓаните сами да одлучат. Само политичари со црни петна зад себе, кои не веруваат и го потценуваат народот, може да се сомневаат во неговиот капацитет“, соопштија од ВМРО-ДПМНЕ по средбата.

Било истакнато дека Република Македонија се наоѓа во многу тешка и деликатна ситуација, пред сè, како што стои во соопштението, поради неодговорноста на политичари и луѓе водени од желбата за остварување на личен профит и комодитет, додека ги распродаваат државните и националните интереси.




Спонзорирани линкови

Маркетинг