Агенцијата за истражување при Пентагон потврди дека ќе бидат инвестирани две милијарди долари во вештачка интелигенција со цел да се развијат машини кои ќе бидат способни сами да учат и да донесуваат сопствени одлуки.
Овие финансиски средства ќе овозможат финансирање на 20 веќе започнати проекти, а ќе бидат стартувани и други во следните 12 месеци, изјави директорот на агенцијата, Стивен Вокер.
Тие инвестиции се наменети за „трансформација на компјутерите од специјализирани алатки во партнери за решавање на проблемите“, изјави Вокер.
„Сакаме да ги истражиме начините на кои што машините можат да совладаат вештини за резонирање, машините да станат способни да препознаат одредена ситуација или опкружување, промената во него и да се прилагодат на сето тоа“, додаде тој.
Како што пренесуваат американските медиуми, речиси најголемиот дел од проектите ќе бидат сконцентрирани на развој на вештачка интелигенција која ќе биде имплементирана во веќе напредните американски дронови, од кои што се очекува во иднина да можат да вршат автономни, односно самостојни операции, сами да избираат мети и да одлучат дали да нападнат, или не.
