Младите тајландски фудбалери кои по три недели биле спасени од пештерата на северот на земјата, им се заблагодариле на сите кои им помогнале да излезат на површината со традиционален тајландски поздрав - со споени дланки.
На снимката од болницата се гледа како лежат во иста просторија, со маски на лицата, и судејќи по снимките, добро се расположени.
Децата моментално се во карантин, бидејќи лекарите стравуваат од инфекции, поради што им е забранет и физички контакт со родителите. Родителите на групата која прва била извлечена во неделата, на 8. јули, добиле дозвола да ги посетат, но морале да носат заштитна облека и да стојат оддалечени најмалку два метри од претпазливост.
Тонгчај Лертвилаиратанапонг, инспектор во Министерството за здравство, потврдил дека едно дете од последната група имало белодробна инфекција, а сите останати добиле вакцини против беснило и тетанус. Генерално децата имаат добро здравје, а претходно било објавено дека младите фудбалери во просек изгубиле по 2 килограми.
Не е познато кога ќе бидат пуштени дома.
There they are!
— James Longman (@JamesAALongman) July 11, 2018
Glorious pic.twitter.com/ZipxJJkMY1
Децата и нивниот тренер во пештерата престојувале од 23. јуни. Спасени биле во текот на последните три дена во три фази - првиот ден четворица, потоа уште четворица, за последниот ден да бидат извлечени и последните четири млади фудбалери, но и нивниот тренер.