Илјадници луѓе се собраа во Истанбул во знак на протест за преселувањето на амбасадата на САД од Тел Авив во Ерусалим и смртоносните судири долж израелско-палестинската граница.
Тие носеа транспаренти со натписи: „Ал Кудс им припаѓа на муслиманите (Ал Кудс е арапски назив за Ерусалим) и скандираа „Бог е голем“ и ги палеа знамињата на САД и Израел.
Еден говорник на протестите ги нарече Американците „кучиња“, додека толпата скандираше „Ерусалим е наш и ќе биде наш!“.
Собирот го организираше про-исламската хуманитарна фондација, откако Турција жестоко ги искритикува САД и Израел за селидбата на амбасадата.
Говорејќи во Анкара, турскиот премиер Бинали Јилдирим ги осуди двете земји што ја слават селидбата додека, како што рече, невините и незаштитените Палестинци стануваат маченици.
