Арсен Венгер вчера објави дека по завршувањето на сезоната ќе го напушти Арсенал. Објавата израдува голем број на фановите на славниот лондонски клуб, а најважното прашање во овој момент е кој ќе го наследи Венгер.
Францускиот тренер е рекордер според бројот на натпревари на клупата на еден клуб во Премиер лигата. Тој Арсенал го предводи 22 години.
Медиумите пишуваат дека главен фаворит за неговото место е Луис Енрике. Шпанецот бил во добри односи со новиот шеф за фудбалски прашања Раул Санлехи. Наводно Енрике веќе имал разговори со преставниците на Арсенал, а она што засега е пречка е платата. Имено, Шпанецот побарал плата каква што имал Венгер.
Енрике е поранешен тренер на Барселона Б, Рома, Селта и Барселона. Со Барселона за три сезони успеа да освои девет трофеи, вклучувајќи го и оној во Лигата на шампионите.
Покрај Луис Енрике, како можни наследници на Венгер се споменуваат Карло Анчелоти кој е без работа од октомври минатата година, како и актуелниот менаџер на Селтик Брендан Роџерс.
