Сменетиот лидер на Каталонија, Карлес Пуџдемон, побара да му биде гарантирано правично судење.
Тој од Брисел изјави дека нема да избега од органите на правосудството, но нема да се врати во Шпанија додека властите не му гарантираат дека ќе му го исполнат барањето. Истовремено посочи и дека нема да бара политички азил во Белгија, но ќе остане тука со цел „да му го објасни на светот недостигот од демократија во шпанската држава“.
Претходно, шпанското правосудство упати повик до Пуџдемон и 13-те сменети официјални лица од Каталонија в четврток и в петок да се појават на суд на сослушување.
Дел од медиумите пишуваат дека двајца од поранешните службеници синоќа се вратиле во Барселона. Едниот од нив, Хоаким Форн, своевремено задолжен за внатрешните работи на Каталонија, наишол на група противници на независнот на шпанската област, кои почнале да го нарекуваат „предавник“.
Белгискиот премиер Шарл Мишел изјави дека Пуџдемон за време на престојот во Белгија има ист третман со кој било граѓанин на Европа.
Каталонскиот локален весник „Вангвардија“ пренесе дека Пуџдемон ќе се врати во Барселона со уште две неименувани официјални лица, но информацијата не е потврдена од други извори.
Пуџдемон е сменет минатата недела откако прогласи независност на Каталонија. Централните власти итно воведоа директна принудна управа и ја укинаа автономијата на областа. Шпанскиот премиер Маријано Рахој распиша вонредни регионални избори за 21 декември.
