Целото сменето раководство на Каталонија побегнало во Брисел, пренесува "La Vanguardia". Уште еден дневник со седиште во Барселона, "El Periodico", и претходно пишувал дека Пуџдемон се наоѓа во белгиската престолнина.
Шпанците денес објавиле дека ќе поднесат обвинение против целото каталонско раководство поради бунт, што според шпанските закони значи дека Пуџдемон и останатите би можеле да добијат по 30 години затвор. Уште пред тоа, Белгија им понудила азил.
Шпанскиот државен обвинител Хозе Мануел Маза денеска повикал на поднесување на обвинение против каталонските лидери поради бунтот и спротивставувањето на шпанските власти, пишува Reuters.
Освен тоа, државниот обвинител смета дека каталонските лидери би требало да се обвинат и за незаконско користење на средствата од буџетот.
Максималната казна за бунт во Шпанија изнесува 30 години затвор, а за непослушност 15 години.
Во склад со шпанскиот правосуден систем, ова барање оди на разгледување кај судија, од кого Маза побарал да "ги повика сепаратистичките лидери да сведочат".
Сменетиот каталонски претседател, Карлес Пуџдемон, утрово на Инстаграм објавил фотографија пред претседателската палата, со порака "Добар ден", но таму не бил виден, јавува Guardian.
Кон претседателската палата тргнала и претседателката на Парламентот, Карме Форкадел, но шпанските медиуми објавиле дека почнала "да го чисти распоредот" по одлуката за распуштањето, која била донесена во Мадрид.
Единствено кој потврдено бил во зградата е министерот Жозеп Раул, кој на својот профил на Твитер објавил фотографија од себе на работната маса. Сепак, кратко потоа и тој ја напуштил претседателската палата.
Од друга страна, стотина граѓани и новинари пред зградата на Владата чекаат дали ќе се појави Пуџдемон. Каталонската полиција, со новиот шеф, добила налог да го надгледува напуштањето на канцелариите, а службениците денес мора да ги изнесат своите работи.
"Уште чекаме да видиме што ќе се случи", рекол еден полицаец на влезот. Неколку комбиња на каталонската полиција се наоѓаат во зградата. Активистите за независност истакнале каталонско знаме пред влезот, додека неколку заговорници на шпанското единство поставиле свое.
Поддршка од Корзика, "азил" од Белгија
1. Дошла и една поддршка за независноста на Каталонија. За жал, не од држава. Жан Гај Таламони, претседател на регионалното Собрание на Корзика, на Твитер го поздравил раѓањето на Република Каталонија. Тој го води движењето за независност на тој остров, "Corsica Libera".
2. Иако многумина очекувале сецесионистичкиот набој да се прошири на Белгија, тоа не се случило. Фламанците тврдат дека на ситуацијата во Каталонија не гледаат како на преседан, туку како на интересен случај за анализа. Порачале и дека ситуацијата во Белгија е сосема поразлична од таа во Шпанија.
3. Ако Каталонија не се повлече, што е речиси невозможно да се очекува, ќе се најде во група од земји кои тврдат дека се независни, но никој не им верува. На тој список се Нагорно Карабах, Абхазија и Јужна Осетија. Тука е и Придњестровлје, кое не го признава никој. И секако, Турски Северен Кипар, кој го признава само Турција.
