Мохамед Салах скоро една деценија е дел од англискиот великан Ливерпул, но токму ова може да биде негова последна сезона на „Енфилд Роуд“.
Тој го нема посакуваниот учинок во тековнава кампања, па на последните три натпревари не беше стартер, а на два од нив воопшто не доби ниту шанса по што имаше едно експлозивно обраќање по кое се поставува прашањето дали можеби веќе го има одиграно последниот меч за шампионот.
Африканецот е „избришан“ за соочувањето со Интер, се очекува така така да биде и за дуелот со Брајтон по што следи заминувањето и настап со Египет на африканскиот Куп на нации. Прашалници за неговата иднина дефинитивно има, а додека се реши ова прашање ќе има доста коментари, а во меѓувреме своите „пет минути“ ги имаше легендата на клубот Џејми Карагер кој го подбра офанзивецот.
-Мислев дека е срамота она што го направи по натпреварот. Некои луѓе го прикажаа како емоционален излив. Јас не мислам дека беше. Мислам дека секогаш кога Мо Салах ќе застане во микс зоната, што го има направено четири пати за осум години во Ливерпул, тоа е кореографирано со него и неговиот агент за да се предизвика максимална штета и да се зајакне сопствената позиција.
-Тој го направи тоа пред 12 месеци, и јас го критикував. Играше на срцето на навивачите на Ливерпул. Ливерпул беше на врвот на лигата, тој го постигна победничкиот гол против Саутемптон, и тоа беше време да излезе и да изврши притисок врз сопствениците на Ливерпул. Тој го избра овој викенд да го направи ова, и чекаше, мислам, да избере лош резултат за Ливерпул. Навивачите, менаџерот, сите во клубот се чувствуваат како да се на дното, а тој го одбрал токму тој момент да се обиде да го повика менаџерот и можеби да го отпушти, -рече Џејми и додаде:
-Единствената реплика што ми се издвојува е „фрлен под автобус“. Тој го фрли клубот под автобус двапати во последните 12 месеци. Со менаџерот во моментов, тој треба да направи сè што може за да му помогне на клубот да се извлече од најлошата серија што ја имаа од 1950-тите, а тој не го направи тоа. Не беше голема ѕвезда пред да дојдеш во Ливерпул, не освои многу за Египет, без разлика колку си голем, ти треба помош од твоите соиграчи, твојот менаџер и навивачите, важно е да го запомни тоа. Кога зборува по Лидс, сè е за мене, мене, мене, -порача Карагер за „Скај Спорт“.
