Министерот за одбрана на САД, Пит Хегсет, издаде наредбa да се „убијат сите на бродот“ во напад врз осомничени шверцери на дрога крај брегот на Тринидад, според извори цитирани од „Вашингтон пост“. Ова е првиот смртоносен напад како дел од новата кампања на администрацијата на американскиот претседател Доналд Трамп против наводните наркотерористи на западната хемисфера.
„Вашингтон пост“ пишува дека нападот, извршен на 2 септември, предизвикал сериозни правни и етички сомнежи кај некои американски функционери и експерти за меѓународно хуманитарно право.
„Наредбата беше да се убијат сите“
Според „Вашингтон пост“, американски авион за надзор поминал часови следејќи брод со 11 лица за кои разузнавачките служби верувале дека транспортираат дрога. Откако аналитичарите ги потврдиле сомневањата, Хегсет – според две лица директно запознаени со операцијата – издал усна наредба.
„Наредбата била да се убијат сите“, изјавил еден извор за „Вашингтон пост“.
После тоа, американската војска испалила ракета што го погодила бродот, кој потоа бил зафатен од оган „од предниот до задниот дел“. Командантите го следеле снимањето од дронот неколку минути додека чадот не се расчистил. Потоа виделе двајца преживеани мажи како се држат за остатоците од бродот.
Според два извори цитирани од „Вашингтон пост“, командантот на специјални операции што ја водел операцијата, адмиралот Френк М. „Мич“ Бредли, наредил втор напад за да се изврши наредбата на Хегсет дека „никој не треба да преживее“.
Според WP, двајцата преживеани биле „разнесени во воздух“ во водата. Подоцна истиот ден, Трамп објавил кратко, цензурирано видео од нападот, но без делот каде што преживеаните биле убиени.
