Денеска е издадено портокалово предупредување поради невреме за делови од Англија и Велс, бидејќи бурата Клаудија се подготвува да донесе обилни дождови и можни поплави.
Метеоролошката служба предупредува дека во некои области за само 24 часа може да наврне дожд колку за еден месец. Ситуацијата би можела дополнително да се влоши со силни источни ветрови и грмотевици. Поплавите се веројатни, а некои области ќе добијат до 150 мм дожд.
Портокаловиот метеоаларм е во сила од пладне до крајот на денешниот ден и опфаќа делови од Велс, Мидлендс, југозападна и југоисточна Англија, како и истокот на земјата. Предупредувањето е проширено и на делови од северна Англија. Бурата, именувана од шпанската метеоролошка служба, донесе предупредувања и во Шпанија и Португалија, а ги погодува и Канарските Острови. Според Метеоролошката служба, Клаудија може да предизвика прекини во сообраќајот, прекини во електричната енергија и поплави.
Британскиот Црвен крст соопшти дека неговите служби за итни случаи се во состојба на готовност за пружање помош на најранливите заедници. Според жолтото предупредување за дожд, јужна Британија може да се соочи со 30 до 50 мм дожд, додека за источен Велс и централна Англија се предвидуваат до 80 мм. Меѓутоа според „Sky Weather“, најјужните делови на Англија би можеле да избегнат обилни врнежи од дожд. Поради источните ветрови, ридските области со источна ориентација би можеле да се соочат со до 150 мм дожд, особено во југоисточен Велс.
Главниот метеоролог на Метеоролошката служба, Метју Ленерт, изјави: „Бурата Клаудија ќе донесе многу обилни врнежи од дожд низ поголемиот дел од централна и јужна Англија и Велс од петок до сабота. Дождот ќе се задржи во некои области, каде што во еден ден би можеле да наврнат месечни количини на врнежи од дожд“.
Дождот е главниот ризик поврзан со бурата Клаудија, но ќе се развијат и силни источни ветрови, со налети до 112 км/ч во делови од северозападен Велс и северозападна Англија, предупреди Метеоролошката служба. Ирската метеоролошка служба „Met Éireann“, исто така, издаде предупредувања, со очекување на значителни врнежи од дожд во југоисточниот дел на земјата во текот на викендот, пренесе Скај њуз.
Според Агенцијата за животна средина, три предупредувања за поплави биле издадени во 2 часот наутро – едно за кампот Кесвик во Лејк Дистрикт и две за реката Еден во Карлајл. Министерката за поплави Ема Харди изјави: „Со прогнозите за обилни врнежи од дожд за делови од земјата, ја разбирам загриженоста на луѓето за нивните домови и имот. Постојано сум во контакт со Агенцијата за животна средина во врска со нивните мерки и тие, заедно со локалните власти и службите за итни случаи, веќе ги преземаат сите потребни чекори за заштита на заедниците“.
Автомобилската асоцијација (AA) им советувала на луѓето да избегнуваат патување во „опасни временски услови“, предупредувајќи: „Безбедноста е на прво место. Условите можат брзо да се променат, затоа следете ги информациите и бидете подготвени пред да патувате. Поплавите може да се појават ненадејно, а плитката вода може да биде опасна – никогаш не обидувајте се да возите низ неа“.
Во текот на викендот северот на Велика Британија ќе биде погоден од постудена воздушна маса, со мразови преку ноќ, објави Метеоролошката служба. Појужно, викендот ќе започне претежно облачно и дождливо, додека најјужните делови од земјата нема да бидат многу погодени. Потоа дождот постепено ќе се намалува и ќе се повлекува кон југ, а посувите и постудените услови ќе се прошират од север низ целата земја на почетокот од следната недела.
На почетокот од следната недела се очекува температурите нагло да паднат, особено на север и исток, донесувајќи го првиот снег за оваа сезона на некои места. Во источна Португалија, постар пар починал во поплавена куќа во четврток, потврди Службата за цивилна заштита на Португалија за „Скај њуз“. Парот живеел во Фернандо Феро, во општината Сеишал, околу 26 километри јужно од Лисабон. Половина од земјата беше под црвено и портокалово предупредување во четврток, со речиси 14.000 луѓе без струја. Делови од Шпанија исто така беа под портокалово и жолто предупредување поради бурата Клаудија.
