„Дури 97 проценти од испитаниците не успеале да ја разликуваат музиката создадена целосно од вештачка интелигенција од онаа создадена од луѓе“, се наведува во објавата на „Deezer“. Анкетата била спроведена меѓу 6 и 10 октомври во осум земји: Бразил, Велика Британија, Канада, Франција, Германија, Јапонија, Холандија и САД.

Од „Deezer“ велат дека повеќе од половина испитаници изразиле непријатност бидејќи не можеле да ја препознаат разликата. Речиси половина од нив сметаат дека вештачката интелигенција може да им помогне во откривање нови песни, но истовремено се многу посомничави кога станува збор за последиците што музиката генерирана со "AI" може да ги предизвика.

„Луѓето сакаат да знаат дали слушаат "AI" музика или вистинска“

Истражувањето опфатило и пошироки прашања за влијанието на вештачката интелигенција. Дури 51 процент од испитаниците изјавиле дека технологијата ќе доведе до појава на поголем број песни со пониска квалитетна вредност на стриминг-платформите, а речиси две третини (64 проценти) веруваат дека ќе предизвика губење на креативноста во музичкото творештво.

„Резултатите од истражувањето јасно покажуваат дека на луѓето им е навистина грижа за музиката и дека сакаат да знаат дали песните што ги слушаат се создадени од вештачка интелигенција или од човек“, изјави извршниот директор на „Deezer“, Алексис Лантерние.

Од компанијата додаваат дека не само што забележале зголемување на бројот на содржини генерирани со "AI" кои се појавуваат на нивната платформа, туку и дека тие содржини наоѓаат сè повеќе слушатели.

Некои "AI" песни станаа вирални

Во јануари, секоја десетта песна што се стримуваше дневно била целосно генерирана од вештачка интелигенција. Десет месеци подоцна, тој процент пораснал — станува збор за секоја трета песна, односно околу 40.000 дневно. Осумдесет проценти од анкетираните изјавиле дека сакаат музиката создадена со "AI" да биде јасно означена за слушателите.

„Deezer“ е единствената голема стриминг-платформа која систематски ја означува содржината создаден од вештачка интелигенција. Проблемот доби на тежина во јуни, кога бендот под името „The Velvet Sundown“ неочекувано стана вирален на „Spotify“, а дури следниот месец беше потврдено дека станува збор за музика создадена со "AI".

Најпопуларната песна на овој „"AI" бенд“ била пуштена повеќе од три милиони пати. Како одговор на тоа, „Spotify“ — кој веќе беше обвинуван за недоволна транспарентност во однос на користењето на "AI" — во септември најави нови мерки со кои ќе ги поттикне уметниците и издавачите да бидат поотворени и да ја откриваат употребата на вештачка интелигенција во музичката продукција.