Шесткратниот добитник на наградата Еми, познат по улогите на Дик Соломон во серијата „Трет камен од сонцето“, Винстон Черчил во „Круната“ и филмовите „Конклава“, „Планинарот“ и „Меѓуѕвездена“, ја сподели веста во ексклузивно интервју за „ScreenRant“. Со оваа објава, тој стана првиот официјално потврден член на актерската екипа на серијата.

Во филмскиот серијал за Хари Потер, ликот на Дамблдор претходно го толкуваа Ричард Харис и Мајкл Гамбон. Волшебникот е директор на Хогвортс и еден од најомилените ликови во волшебниот свет на Џ.К. Роулинг.

Литгоу призна дека одлуката да ја прифати улогата не била лесна, имајќи предвид големиот ангажман што го бара проектот во оваа фаза од неговата кариера.

– Искрено, целосно ме изненади. Бев поканет додека бев на филмскиот фестивал во Санденс за друг филм, и не беше лесно да донесам одлука. Се плашам дека оваа улога ќе го одбележи последното поглавје од мојот живот. Но, многу сум возбуден. Големи луѓе повторно го насочуваат вниманието кон Хари Потер, и токму затоа одлуката беше толку тешка. Ќе имам околу 87 години на завршната забава, но реков „да“ – изјави Литгоу.

Што знаеме за серијата?

Производството ќе започне ова лето во студиото Warner Bros Leavesden. Серијата ќе има целосно нова актерска екипа, а секоја од седумте книги ќе добие посебен третман, со план за снимање на седум сезони.

Стриминг-платформата Max (поранешен HBO Max) веќе нагласи дека оваа адаптација ќе биде „верна на култните книги“.

Во меѓувреме, сè уште се шпекулира за останатите улоги. Според странските медиуми, Папа Есиеду е во трка за улогата на Северус Снејп, додека Брет Голдстајн се разгледува за Хагрид. Фановите ја поддржуваат идејата оскаровецот Килијан Марфи да го игра Волдеморт, а се споменуваат и имињата на Шерон Хорган и Лесли Менвил, иако сè уште нема официјални потврди.

За потсетување, оригиналните филмови за Хари Потер беа објавени од 2001 до 2011 година, а ниту еден од актерите од тие филмови не се очекува да се појави во новата серија.