На сила се неколку временски предупредувања, а 16 предупредувања за поплави се издадени во Англија и Шкотска.
Во Велика Британија е активен жолт метеоаларм, додека црвен метеоаларм беше издаден во Ирска. Дождот и силните ветрови го попречуваат сообраќајот во моментот поради бурата Берт во Велика Британија, пренесува NewsSky.
Во најголемиот дел од Велика Британија е прогласен жолт метеоаларм за ветер, дожд и снег, а за делови од северна Англија и централна Шкотска е издадено построго предупредување. Во две области во Ирска е активен црвен аларм поради силен дожд.
Лондон, Источна Англија, Бирмингем, Манчестер, Ливерпул, Хал и делови од Мидлендс се единствените области без тековни предупредувања.
„Националните автопати“ издадоа предупредување за лоши временски услови поради снегот што се очекува да падне во Јоркшир и североисточна Англија помеѓу 5 и 15 часот.
Во Јоркшир, автопатот беше затворен во текот на ноќта во двете насоки помеѓу Холингворт и Флок поради снегот, објавија „Националните автопати“. Бројни рути се затворени за сообраќај.
Во Шкотска, Советот на Перт и Кинрос го откажа својот годишен настан за палење на Божиќни ламби во Перт заради безбедноста на луѓето. Метеорологот Ејдан Мекгиверн го опиша невремето што моментално трае како „настан со повеќе опасности“.
Два до четири часа ќе падне силен снег во делови од северна Англија и Шкотска во сабота наутро. Снегот ќе биде густ и брз, со наслаги од пет до 10 см во пониските области и 20 до 40 см на повисоките. Силниот ветер ќе создаде снежни наноси, особено во ридските предели на северна Англија и Шкотска. Условите за патување ќе бидат ужасни, премините преку планините ќе бидат опасни, а постои и ризик од прекин на електричната енергија. Ова е настан со повеќе опасности, но снегот ќе се стопи брзо - рече тој.
Според него, температурите ќе се зголемат брзо бидејќи невремето носи топол воздух од Атлантикот, што ќе доведе до „брзо топење“ на снегот до попладне.
