Компанијата „Мета“, сопственик на популарната социјална мрежа Инстаграм, најави воведување на нов режим за тинејџери, кој на родителите ќе им даде дополнителна контрола врз активностите на нивните деца на оваа платформа, пишува српска „Република“.
Според тоа, сите корисници на возраст под 18 години, вклучително и креаторите на содржини, автоматски ќе бидат префрлени на тинејџерски сметки, а јавните објави ќе бидат можни само со специјална родителска дозвола. Префрлувањето на сметки за тинејџери се врши автоматски, а на корисниците под 16 години ќе им треба дозвола од родител или старател да ги променат поставките за нивната сметка.
Од друга страна, тинејџерите постари од 16 години ќе можат сами да направат корекции, освен ако нивните профили сè уште не се под родителска контрола. Со цел да се спречат потенцијалните злоупотреби, компанијата „Мета“ најавува тестирање на мерки кои ќе ги спречат тинејџерите да го фалсификуваат датумот на раѓање или да креираат нови сметки за заобиколување на правилата.
За да ја процени возраста на корисникот, „Мета“ ќе користи алатки за вештачка интелигенција, а во случај на сомнеж ќе бара дополнителни информации како податоци од лична карта или селфи за да ја потврди возраста. Ова е дел од поширокиот план на компанијата да обезбеди побезбедна средина за тинејџерите на социјалните мрежи, имајќи предвид дека се очекува тие да се обидат да ги заобиколат новите правила.
Важно е да се истакне дека овие нови правила се дел од напорите на „Мета“ да ја подобри заштитата на помладите корисници на Инстаграм и да им даде на родителите поголема контрола врз активностите на нивните деца на платформата.
