Министерот за надворешни работи на Србија, Ивица Дачиќ, рече дека останува на меѓународната заедница сега да преземе се што бараат законите и меѓународните обврски и налагаат, односно да осигура безбедност и стабилност за Србите на Косово.
Дачиќ за РТС изјави дека ескалацијата на неодговорното однесување на Приштина, што предизвикува конфликтни ситуации, трае со месеци.
„Наместо нормализација, постојано имаме ескалација предизвикана од Албин Курти и деескалација, на која работи дел од меѓународната заедница. Резултатот е подмолен план – на Курти му се дозволува да направи нешто, меѓународната заедница протестира како нешто, а потоа останува остварена работа која е од едностран карактер и се надеваат дека ќе стане политичка реалност“, рече Дачиќ.
Тој нагласи дека улогата на КФОР не е да протестира, туку да спречи унилатерален чин и дека не е улога на КФОР да стои пред општинските згради и да го спречува српскиот народ да ги врати зградите.
„КФОР сега практично ги штити градоначалниците под изговор за зачувување на мирот. Ги штити од сопствениците на тие згради, кои се Срби, од оние што работат таму, од вработените, рече Дачиќ.
Тој додаде дека Србија тоа го посочила уште пред неколку месеци и дека сите добро знаат какви се ставовите на Србија.
Посочи дека гаранциите на КФОР не вредат ништо за Србите бидејќи имаат за цел само да ги измамат.
„Тоа не е наш негативен однос кон нив, туку се работи за тоа дали ќе го исполнат тоа што се должни да го исполнат или не. Не ја провоцирајте Србија со тоа што ќе кажете дека Србија мора да го направи тоа. Ако некој мисли дека ова ќе трае бесконечно со тоа што Србија ќе трпи ваква ескалација против Србите, и да паднат жртви, не дај Боже… Навистина не разбирам ако некој не гледа дека ваквото нешто мора веднаш да се прекине“, нагласува Дачиќ.
Според него, кризата на северот на Косово треба да заврши кога оние кои со години и помагаат на Приштина ќе кренат телефон или ќе дојдат во Приштина и ќе го решат проблемот.
„Да не играме криенка и да се правиме дека не можат да влијаат на Курти. Што е Курти? Суперсила? Предупредувањата може да ѕвонат во нашите уши, но од предупредувања не се живее. Ако САД не можат да ја принудат Приштина да го почитува тоа, не знам каква доверба можеме да имаме во меѓународната заедница и во оние што го спонзорираат тој опасен воен авантуризам во Приштина“, рече Дачиќ.
Истакна дека српските воени сили се во состојба на готовност и предупреди дека ќе ги заштитат Србите доколку треба.
