Пристигнува продолжение на хит романтичната комедија „The Holiday“ и тоа со оригиналната актерска постава.
Камерон Дијаз, Џад Ло, Кејт Винслет и Џек Блек се враќаат во продолжението на еден од најубавите празнични филмови.
За потсетување, Британката Ајрис (Винслет) и Американката Аманда (Дијаз) одлучуваат да си ги заменат домовите во текот на празниците и двете се заљубуваат, пронаоѓајќи ја љубовта во светот на онаа другата.
Според извор на „The Sun“, снимањето би требало да започне следната година, а главните актери веќе потпишале договори.
„Планот е да се започне со снимање следната година, главно на локации во Велика Британија и Европа, а главните ѕвезди веќе потпишаа договори и се подготвени“, открил извор близок до продукцијата.
„Ова е еден од најуспешните празнични филмови во кој секоја година уживаат милиони обожаватели ширум светот - логично е повторно да ги посетиме главните ликови и да откриеме што се случило откако се споиле“, вели изворот.
„Ќе биде смешен, емотивен и топол филм – токму она што сите го посакуваат за Божиќ“, додал тој.
Инаку, снимањето на филмот чинело 70 милиони фунти, но заработи повеќе од 200 милиони фунти на кино благајните и стана еден од филмовите на врвот на празничната листа.
