Светскиот шампион во тешка категорија Тајсон Фјури се покажа 3,5 килограми потежок од предизвикувачот Дерек Чисора и вети „масакр“ на стадионот на Тотенхем.
Вечерашната борба за титулата на Светскиот боксерски совет (ВБЦ) може да се одржи на студено време за публиката од 60.000 луѓе, но и двајцата Британци се обидоа да ја зголемат топлината кога стапнаа на вагата во Изложбениот центар во Северен Лондон.
Боксерите ќе се сретнат во финалниот меч од меѓусебната трилогија. Фјури (34) ќе се бори со Чисора по третпат, откако го победи во 2011 и 2014 година.
Фјури, кој нема пораз во професионалниот ринг, тежи 121,9 килограми, а предизвикувачот Чисора е тежок 118,3 килограми.
Влегувајќи со ременот врзан преку рамо, Фјури им порача на фановите да очекуваат масакр во рингот.
„Ќе биде апсолутно брилијантна борба. Масакр. Очекувајте масакр. Без разлика дали е една рунда или 12, јас сум подготвен. Подготвен сум за војна“, изјави Фјури.
Двајцата потоа застанаа лице в лице, а Фјури блескаше против својот повозрасен и понизок противник, како што одминуваше времето.
„Многу сум возбуден“, изјави 38-годишниот Чисора, кој има 12 порази во 45 борби.
Запрашан за неговите планови пред борбата, тој рече дека ќе ја помине вечерта дома со своето семејство и можеби ќе гледа некои емисии за готвење со една од неговите ќерки.
