Франција би можела да бара исклучоци од некои царини и ограничувања наметнати со американскиот антиинфлациски закон, но Европа мора да преземе чекори за да ги заштити своите економски интереси, рече министерот за финансии Бруно Ле Мер.
Европејците тврдат дека огромниот пакет субвенции за заштита на американските производители во Законот за намалување на инфлацијата (IRA) може да им нанесе фатален удар на нивните компании, кои се најдоа во неволја поради високите цени на енергијата.
Ле Мер ќе го придружува францускиот претседател Емануел Макрон во државната посета на САД оваа недела. „Франција би можела да побара изземања од некои тарифи и ограничувања воведени од американската администрација. Но, вистинското прашање што треба да си го поставиме е со каква глобализација се соочуваме? изјави Ле Мер на телевизијата Франс 3.
„Кина го фаворизира кинеското производство, Америка американско. Време е Европа да почне да го фаворизира европското производство… Сите европски земји мора да разберат дека, со оглед на ваквите американски одлуки, мора да научиме подобро да ги штитиме и браниме нашите економски интереси“, рече тој.
Францускиот претседател ќе се обиде да ги убеди САД дека е во нивен интерес да не ги ослабуваат европските компании во време кога западните сојузници се соочуваат со интензивна економска конкуренција од Кина, за која велат дека ја користи својата економска моќ како дипломатска потпора.
Францускиот лидер ќе се обиде да преговара за исклучоците за европските компании на линијата на оние што САД им ги доделија на Мексико и Канада, рече советникот на францускиот претседател.
