Го придвижува најмоќниот шестцилиндарски мотор во историјата на BMW.
Легендарниот 3.0 CSL настанал во 1972-ра година, а сега, по половина век, доаѓа неговиот духовен наследник. „M“ одделот исто така го слави 50-тиот роденден, а наместо свеќа на тортата претстави низа интересни новитети, од каравански „M3“, преку нов „M2“, па се до „CSL“.
И натаму тоа е екстремно спортско купе, но овој пат без хомологациски тегови за натпреварување. Новиот „CSL“ е тука за да го крене имиџот на марката, да донесе дополнителна заработка, но и да и покаже на конкуренцијата како во Баварија може да настанат вистински работи.
Новиот 3.0 CSL се наметнува со агресивен изглед, а купе формата ја презема од „M4“. Освен натпреварувачките налепници, посебно ефектно изгледаат златните бандажи, од напред од 20 инчи, а од назад за број поголеми. Назад повторно гордо стои крилото, исто како што тоа беше случај и на оригиналот. Се на се, доволно и за наследникот да добие прекарот „Batmobile“.
Под хаубата има 3.0 твин-турбо мотор, сега дотеран на дури 560 коњски сили и 550 Nm. Да, максималниот вртежен момент е помал отколку на „M4 CSL“, но со добра причина – овој новитет има рачен менувач. Ако го додадеме на се и задниот погон, јасно е дека забавата со овој болид е загарантирана.
И знајте дека овој автомобил е многу полесен од „M4 CSL“, дури 355 килограми. За се да мине во најдобар ред, се грижат композитните кочници. За сè друго ќе се погрижи возачот и неговото искуство.
„BMW“ планира да произведе само 50 примероци, а за тоа ќе му бидат потребни три месеци. Производството на секој примерок со доста рачно изработени компоненти трае 10 дена, па сметајте на тоа дека цената ќе биде висока.