Возот наречен „Ski Express“ ќе ги носи патниците директно од холандските градови Амстердам и Утрехт до неколку австриски скијачки центри.
Новиот ноќен воз ќе ги носи скијачите од Амстердам и Утрехт во Холандија сè до австриските Алпи. Тоа е резултат на соработка помеѓу туристичката компанија „Tui“ и „Green City“, холандски давател на услуги за ноќни возови.
Идејата е следна: ставете ги скиите и опремата во возот во Холандија, исклучете ги светлата за мирна ноќ, а наутро разбудете се со енергија и спремни за еден ден скијање по австриските падини. Ако сте скијач, веруваме дека можете да го замислите ова без никакви проблеми.
Новата услуга на „Tui“ ќе работи од 23 декември до 31 март 2023 година, а рутата тргнува од Амстердам во петок во 17:30 часот пред да се упати кон Утрехт. На австриската граница возот ќе биде поделен на два дела: едниот дел ќе оди за Тирол, а другиот за Салцбург.
„Ski Express“ не е единствениот ноќен воз посветен на скијањето што ќе биде пуштен оваа година. Сличен проект на соработка меѓу железничкиот оператор „European Sleeper“ и туристичката агенција „Sunweb“ ќе води до ски-центар на француските Алпи.
