Фабио Капело со години наназад тврдеше дека Калиду Кулубали игра на ниво на најдобрите дефанзивци во светот, но откако си замина од Наполи, легендарниот Италијанец е најгласен и најпознат критичар на стоперот.
Сенегалецот направи трансфер во Челси и има променливи изданија во дресот на лондонскиот клуб, но иако Челси вчера го победи Милан со 3:0, Капело не остана импресиониран од натпреварот на човекот кој до пред неколку месеци беше командант во одбраната на Лучијано Спалети.
– Од она што можам да го видам, Кулубали нема карактер во Челси. Кога топката е во неговите нозе, изгледа како човек кој постојано се двоуми што да направи со неа.
– Не игра брзо, не игра како што не навикна да го гледаме во Наполи. Во Наполи тој беше командант, одеше напред, даваше долги пасови, а сега има храброст да даде пас на неколку метри, му подава на оној што е најблиску.
– Навистина сум изненаден од него, не можам да го препознаам. Ова не е Кулубали што го знаеме, бидејќи оној од Наполи може да биде многу важен за Челси, – изјави Капело.