Рускиот претседател Владимир Путин вчера потпиша договор за припојување на четири делумно освоени украински региони кон Руската Федерација.
На церемонијата одржана во Кремљ, ден по објавувањето на резултатите од референдумите одржани во Доњецк, Луганск, Херсон и Запорожје во сосема нередовни услови, присуствуваа највисоките руски функционери, пратеници и лидери на четирите територии назначени од Москва.
„Народот избра. Едногласно. Ова е волја на милиони луѓе. Граѓаните на овие четири области засекогаш ќе бидат дел од Русија“, рече Путин.
Аналитичарот Дарко Обрадовиќ, програмски директор на Центарот за стратешки анализи, вели дека организацијата и признавањето на нелегалниот референдум за окупираните украински територии има неколку импликации.
„Ова можеме да го гледаме како излезна стратегија на Путин да го претвори фијаското со нападот на Украина во т.н. одбранбена војна. Ова репозиционирање е наменето за домашната јавност која станува свесна за поразот. Тој се обраќа на т.н. аморфен политички Исток, кој е свесен за слабеењето на руската моќ“, наведува тој.
Како што додава, на тоа треба да се поврзе изјавата на Путин во Узбекистан дека „ќе ја реши ситуацијата во Украина“.
„Создавањето законски услови за употреба на нуклеарно тактичко оружје отвора низа прашања. Кој ќе биде цел на тој напад? Какви ќе бидат последиците за оние за кои Русите тврдат дека ги бранат. Во случај на употреба на нуклеарно оружје, тоа ќе биде прва употреба на овие средства во регионален конфликт. Се поставува прашањето дали се лизгаме кон општо нуклеарно уништување“, изјави Обрадовиќ.
Политикологот Александар Павиќ нагласува дека по анексијата на четирите области, секој напад врз нив ќе се смета за напад врз Русија.
„Постојат неколку опции за рускиот одговор. Русија најпрво може да побара целосно повлекување на украинските сили или да ѝ објави војна на Украина. Дополнително, Русија најавува дека секој напад на нејзина територија, со докажано учество на силите на НАТО, ќе се смета за напад на НАТО врз Русија и дека Русија ќе има право да возврати на територијата на која било членка на НАТО“, вели тој.
Што се однесува до опасноста од употреба на нуклеарно оружје, Павиќ смета дека Русија нема причина да го користи во Украина.
„Според руската доктрина, нуклеарното оружје се користи во случај на нуклеарен напад врз Русија или земја сојузник на Русија или ако се доведе во прашање самиот опстанок на Русија. Целата реторика за евентуална употреба на нуклеарно оружје доаѓа од редовите на структурите и земјите на НАТО, што укажува дека НАТО подготвува некаква нуклеарна провокација за која би била обвинета Русија“, заклучува Павиќ.
