Томас Тухел се активираше со повици до фудбалери кои сака да ги види во својот тим за новата сезона, и тоа веднаш откако доби гаранција од новиот газда дека на располагање има 200 милиони фунти за трансфери.
Наследникот на Роман Абрамович, Тод Боли планира да продолжи онаму кадешто застана Русинот, па за да се рестартира успешната етапа, мора да се носат големи засилувања кои ќе го направат тимот подобар од тоа што беше.
Челси има во план да донесе пет-шест големи засилувања по заминувањата на Ридигер, Кристенсен и Лукаку, а иако на врвот на листата е Рахим Стерлинг со кого Тухел веќе стапил во контакт, Германецот пикирал уште еден играч од актуелниот првак.
Германецот сака да ја искористи ситуацијата и да собере уште еден стандарден резервист на Пеп Гвардиола, кој би можел да има значајна улога во неговиот тим по празнината која настана во одбраната со Ридигер и Кристенсен.
Се работи за Натан Аке кој претходно во кариерата беше дел од Челси, а кој според „Телеграф“ со добри очи гледа на враќањето на „Стемфорд Бриџ“ каде ќе му биде ветена позначајна минутажа. Сепак, дефанзивецот на Сити не е „бомбата“ која ја подготвува Боли со Тухел, бидејќи гласините велат дека клубот подготвува и голема понуда до Јувентус за ангажман на Матијс Де Лихт.
