Потресно сведоштво на гледач по кое Јанко Илковски ја прекина емисијата: „ Жена ми почина на Инфективна со негативен тест, ѝ го украдоа телефонот и накитот“

Од неговото сведоштво се гледа во каква состојба е македонското здравство бидејќи раскажал низ што поминал со неговата сопруга и како таа починала.

„Никој не те гледа, не дај Боже да одиш во болница, оставени се луѓето сами на себе“, рече човекот во емисијата.

Голготата започнала откако неговата сопруга имала проблеми со срцето и бубрезите за да биде примена во болница, но требало да лежи со пациент позитивен на Ковид-19, по што била пуштена дома.

Во домашни услови ѝ се влошила здравствената состојба и веднаш била сместена во ковид-болницата на Инфективното одделение. Но за жал, кратко потоа жената починала, а притоа како што тврди нејзиниот сопруг, ѝ бил украден златниот накит и мобилниот телефон.

Водителот Илковски на Фејсбук напиша дека тој и неговиот тим се длабоко потресени од сведоштвото на човекот.

„Целата екипа, заедно со мене, бевме силно и длабоко потресени од траорното и искрено сведоштво на човекот кој неутешно липаше и плачеше додека говореше за загубата на сопствената сопруга. Кога ќе соберам сили, неговото јавување ќе го издвојам и објавам да биде сведоштво што преживувал народов. Не можам да споделам како се чувствував, најмногу поради фактот што не очекував, беше релативно забавна емисија и не се надевав дека ваков крај може да се случи, како бокс во плексус … уште сум потресен“, напишал Јанко на Фејсбук.