Студениот бран кој минатите денови се проширил на Грција, денеска донел многу ниски температури во некои делови на земјата, снежни врнежи на Атика и бројни ограничувања во сообраќајот.
Студениот фронт кој ја погодил Грција, наречен "Леандрос", донел обилни врнежи од снег од Солун до Атика и предизвикал снемување на струја во источниот дел на Солун денеска, додека на Крит се очекуваат налети на силен ветер и дожд кои ќе траат до вторник.
На повисоките надморски височини на подрачјето на Атика, централна Грција и Пелопонез, на неколку патишта е задолжителна зимска опрема за возила, додека полицијата на некои места го ограничува сообраќајот.
Властите од грчкото министерство за цивилна заштита и секторот за вонредни ситуации вчера разгледувале можности за нови ограничувања во сообраќајот.
