Водечкиот американски експерт за заразни болести Ентони Фаучи ги советувал Американците кои веќе го прележале коронавирусот, или претпоставуваат дека го прележале, сепак да се вакцинираат кога вакцината ќе биде достапна.
Долгогодишниот директор на Националниот институт за алергии и заразни болести рекол дека нема причина да се верува дека вакцината би можела да им наштети на оние кои веќе имале Ковид-19.
"Не мислам дека тоа би требало да е причина за загриженост", рекол Фаучи, охрабрувајќи ги Американците да се вакцинираат.
Два произведувачи, "Pfizer" и "Moderna", ги завршиле клиничките испитувања и утврдиле дека нивната вакцина е делотворна повеќе од 90 проценти.
"Pfizer" поднел барање за регистрација на својата вакцина која Управата за храна и лекови би можела да ја одобри веќе во првата половина на декември.
"Конечната одлука ќе зависи од проценката на "FDA", но мислам дека е многу веројатно дека нема да има ограничувања за вакцинирање на оние кои имаат доказ дека веќе биле заразени", рекол Фаучи.
