Осудениот во случајот „Рекет“ Бојан Јовановски, во скопското обвинителство продолжи со поднесување на кривични пријави поврзани со предметите „Рекет“ и „Меѓународен сојуз“.
Како што истакна неговиот адвокат, Сашо Дуковски, кривичните пријави се однесуваат на најмалку 30 лица и поради содржината Јовановски бара вклученост на меѓународните институции и амбасадите.
„Поради сериозноста на наводите, од страна на пријавителот беше побарано непосредно вклучување на најрелевантните меѓународни институции за заштита на човековите права, особено на најрелевантните свестски амбасади кои имаат свои дипломатско-конзуларни претставништва во Република Македонија заради содржината на тоа што се изјавува“, изјави Дуковски откако минатата недела беа поднесени околу осум кривични пријави, а веројатно тоа ќе продолжи и во следните денови.
Засега е извесно дека кривичните се однесуваат за лица и конкретни дејствија коишто се поврзани со двата предмети, а со нив опфатени се и функционери од државните институции. Јовановски поднесува кривични пријави и за кршење на неговите човековите права, за нехумано и нечовечко однесување од страна на лица кои не биле директно вклучени во постапката.
