Гневните протести се шират низ САД, а во се поголем број на градови ситуацијата наликува на Минеаполис каде што изби револтот против полициската бруталност.
Според последните информации, ситуацијата е крајно тензична и во Детроит каде што за време на протестите дошло и до пукање, при што најмалку едно лице е убиено.
Портпаролот на полицијата во Детроит откри дека непознато лице отворило оган кон демонстрантите од својот автомобил, при што загинало 19-годишно лице. Засега нема повеќе податоци околу напаѓачот, ниту за бројот на ранетите во вооружениот напад.
Ситуацијата во Детроит се влошува од час во час, а тоа важи и за другите градови ширум Соединетите Американски Држави. Засега Националната гарда е ангажирана во две американски сојузни држави – во Минесота и Џорџија.
Да потсетиме, насилните протести ширум земјата избија откако минатиот понеделник од страна на полицијата, за време на приведувањето беше убиен Афроамериканецот Џорџ Флојд од Минеаполис.
