И покрај финансиската криза која завладеа со светот, од Реал Мадрид не планираат лесно да се откажат од намерата да го ангажираат Пол Погба од Манчестер Јунајтед.
Бидејќи нема да може да ги исполнат финансиските барања на „ѓаволите“, од Реал Мадрид подготвиле дури четворица фудбалери кои би ги пратиле на „Олд Трафорд“ во замена за францускиот репрезентативец.
„Сан“ пишува дека Реал Мадрид ќе ги вклучи во понудата Хамес Родригез, Мартин Одегард, Лукас Васкез и Брахим Дијаз во замена за фудбалерот кој оваа сезона не се изнаигра во редовите на Манчестер Јунајтед.
27 годишниот Погба одигра само два натпревари за клубот од „Олд Трафорд“ од септември па навака, а последниот настап за „ѓаволите“ го има на Боксинг деј.
Сепак, Оле Гунар Солскјер не планира да влегува во никакви преговори за негова продажба додека не го види Погба како ќе функционира во средината на теренот со јануарското засилување, Бруно Фернандеш.
Французинот конечно ги надмина проблемите со повредите, па сега се очекува кога сезоната ќе продолжи веднаш да биде во комбинација со Фернандеш во средината на теренот. Доколку овој пар функционира, од Манчестер Јунајтед ќе сторат се да го задржат Погба во своите редови.
