Бројот на лица кои починаа како последица на корона вирусот се искачи на 25, со повеќе од 590 заболени.
Британскиот „Скај њуз“ пренесува дека тоа се претежно луѓе над 60 годишна возраст, а повеќето од нив веќе имале некоја болест.
Поради избувнување на епидемијата, кинескиот град Вухан е ставен во карантин со суспендиран воздушен, железнички и патнички сообраќај, а на жителите им се советува да не патуваат надвор од градот.
Во меѓувреме, научниците се сомневаат дека причина за инфекцијата е отровна змија, или вид кобра, која, со други животни, била продадена на локален пазар чии работници први се разболеле.
Светската здравствена организација (СЗО) денеска ќе донесе одлука дали да прогласи глобална вонредна состојба поради избувнување на новиот корона вирус, кој се шири од Кина.
