Аргентина претрпе шокантен пораз од 2:0 од Колумбија на стартот на Копа Америка, а повеќе од поразот боли безидејната игра која уште еднаш ја прикажаа „гаучосите“.
Секогаш се очекува многу од аргентинската репрезентација, меѓутоа како и на Мундијалот во Русија, така и сега, Аргентина посебно потфрли.
По првиот натпревар против Колумбија, со коментар се јави и легендарниот Ернан Креспо кој даде свое видување за актуелните состојби во репрезентацијата.
– Аргентина не може да најде баланс во играта затоа што има двајца играчи кои воопшто не помагаат дефанзивно, а тоа се Меси и Агуеро. Во нападот на противникот му задаваат големи проблеми, но кога треба да се вратат во одбрана тогаш само шетаат по теренот. Тие се нашите најважни играчи, но мора да помагаат и на одбраната за да има баланс во играта. Не покриваат доволно добро во дефанзива и поради тоа противникот доаѓа блиску до голот без никаков труд. Ако сакаме да изгледаме сериозно, мора да го поправиме тоа, - истакна Креспо.
