Михаил, за тебе велат дека си идниот Никола Тесла. Како ти се роди љубовта кон ова што го правиш и дали може подетално да ни објасниш што всушност претставува тоа? 

Уште како мал имав афинитети кон науката и техниката, можам да кажам дека денешниот развој на науката и техниката е во неверојатен развој и информациите и податоците се полесни за добивање отколку во минатото. Исто така и архивирањето на податоците е во помали уреди и на овој начин се компактибилни за пренесување.

Точка дознава дека досега си бил на многу натпревари со твоите иновации. Можеш ли да ни откриеш кои биле тие и со какви награди се имаш здобиено?

Сум се натпреварувал на многу натпревари од областа на техниката, првата област од моето натпреварување беше во Радио Аматерска Гониометрија – АРГ една област која во денешно време не е многу развиена и луѓето за жал не знаат за каква област станува збор. Втората област беше Применета Физика, па потоа Електротехника и електроника. Сум бил на многу меѓународни саеми - во Чешка, Босна и Херцеговина, Бања Лука… Истотака и ние во Македонија имаме меѓународен саем организиран од Меѓународната Асоцјација на пронаоѓачи на Северна Македонија НАИМ.

Имам конструирано 5 иновации досега. Дел од нив се наградувани со првите 3 места, а некои и со признание. Пласманот е исто така важен, но дружењето со колеги од Македонија и странство е нешто што не може да се опише. Она на што сега работам е уредот за Автоматско следење на сонцето и производство на електрична енергија, за кој е почната постапката за патентирање.

Како постигнуваш да го изменаџираш времето, со оглед на тоа дека постојано си активен - редовно гостуваш на разни телевизии, притоа си студент на ФЕИТ, фотографираш...?

Да, точно е дека со сето тоа се занимавам. Освен техниката тука е и фотографирањето, кое ми е голема пасија, но пред сè ми е факултетот на кој студирам, Феит. Секогаш може да се најде време за сето она што сакаш да го правиш. Член сум на Фото Сојуз, тоа е сојуз на фотографи. Менаџирање на времето ми е силна страна.

Од кого ја добиваш најголема поддршка?

Поддршка секако најмногу добивам од родителите, но во секој случај морам да ги споменам и пријателите. А кога веќе сме кај “пофалбите“, морам да го споменам мојот драг пријател, асистент и менаџер кој неуморно учествува во моето медиумско промовирање - Марко Шипка.

Која е твојата најголема желба и цел која сакаш да ја оствариш?

Сакам сите идеи кои ги имам замислено од областа на иноваторството да ги имплементирам, а се разбира и да ги патентирам. Засега тоа ми е најголема цел кон која се стремам.

За крај, што би им порачал на младите во Македонија?

Прво, и најважно од сè е никогаш да не се откажуваат од она што го сакаат. Без разлика дали тоа е спорт, музика, некоја друга уметност или нешто сосема друго, важно е посветено да работат за да постигнат успех. Ништо не е невозможно ако силно се сака. Еве, јас можам да бидам пример за тоа дека не мора да си заминеш од земјата за да ги оствариш целите. 

Автор: Цеце Николова