„Граѓаните“ дојдоа екстремно блиску до освојување на нова титула во Премиер лигата откако вчера го положија најголемиот тест и славеа на „Олд Трафорд“ со што повторно се вратија во пол позиција во трката со Ливерпул.
Фудбалерите, но и навивачите на Ливерпул ќе очекуваат кикс на актуелниот шампион во Премиер лигата, а нова таква можност ќе имаат овој викенд кога Сити гостува кај Барнли.
Она што е интересно и што влева надеж кај страсните фанови на Ливерпул е тоа што Барнли од сезоната 2009/10 па навака, кога играл во Премиер лигата редовно го победувал актуелниот шампион.
Барнли во 2009 година со 1:0 го совлада тогашниот бранител на титулата Манчестер Јунајтед, во 2014/15 сезона славеше против Сити со идентични 1:0, а во 2017 го совлада Лестер со 1:0.
Последната победа Барнли ја оствари минатата сезона кога славеше врз тогаш актуелниот шампион Челси со 3:2.
Од Ливерпул ќе се молат оваа традиција на избраниците на Шон Дајч да продолжи и во актуелнава сезона која ќе биде неизвесна до самиот крај.