Поради сезонските алергии и прогласената епидемија на морбили на територијата на целата држава, но и по направената сондажа за искористеност на квотите за април на приватните здравствени установи – аптеки, која изнесува од 85 до 90 отсто, Управниот одбор на Фондот донесе одлука за линеарно зголемување на квотите за дополнителни 12.000 денари.
„Ова зголемување е обезбедено за секоја здравствена установа – аптека, освен за апеките со максимална месечна квота од 650.000 денари и ќе важи само за април. Фондот континуирано ја следи достапноста до лековите на рецепт и работи на обезбедување подобра снабденост со лекови во текот на целиот месец“, се наведува во соопштението од ФЗО.
Фондот додава дека ова го прави со цел осигурениците да може да ги подигнуваат потребните лекови во аптеките во близина на своето место на живеење.
