„Во врска со патувањата во Соединетите Американски Држави (САД) навистина ми се допадна начинот на кој Американците работат и функционираат. Имав можност да се уверам во работатата на дел од нивните институции, Стејт Департментот кој плени со професионалност, но и голема љубезност и непосредност од страна на службениците“ вели градоначалникот на Општина Карпош, Стефан Богоев раскажувајќи го своето незаборавно патување за Точка.
- Начинот на кој Американците го почнуваат денот навистина е интересен. Во утринска рутина им е трчањето, а потоа се подготвуваат за работниот ден и дневните обврски. Околу 12:00 часот на пладне се користи паузата за ручек и буквално сите се излезени, ручаат во дел од рестораните (најчесто за брза храна), но многу често ќе видите и луѓе во одело и костими како јадат во маалските паркови и скверови (седат на клупа, трева и го земаат својот оброк).
- При посетите на САД со мене беа и голем дел на млади луѓе – лидери од Македонија, од различни политички партии. Навистина имавме пријатни моменти, како во формалниот дел – состаноци, дебати и посети, така и во неформалниот дел каде што имавме можност да ја „почувствуваме“ Америка од една поинаква перспектива. Да излеземе во нивните кафулиња и пабови, да дознаеме нешто повеќе за нивниот социјален живот кој навистина е побогат од нашиот. Тоа што е добро и интересно е што луѓето кога се во ресторани зборуваат, комуницираат меѓу себе, а не со мобилните телефони. Задоволство ми е што комуникацијата продолжи со голем дел од луѓето со кои заедно бевме во САД. Ова само е потврда дека овие студиски посети придонесуваат за вмрежување меѓу младите, независно од политичка припадност, националност и сл.
- Едно од поубавите искуства е средбата со градоначалничката на Манчестер (сојузна држава New Hampshire), Џоис Крег. Навистина разменивме убави искуства кои ми користат и во мојата работа. Како резултат на успешната средба, веднаш кога се вратив од САД испратив Писмо со намера за поголема соработка до градоначалничката на Манчестер.
- Сметам дека Карпош може да соработува со развиени општини од светот. Корисно е да стекнеме нови практики и искуства од земјата во која луѓето длабоко веруваат во демократијата, изборите, политичките програми и дебати.
- Во текот на дебатите кои ги одржуваа со нашата група постојано беше присутна објективноста на говорниците и страста за политиката. Се сретнав и со претставници на Демократската партија и Републиканците, но и со политички аналитичари и претставници од тинк – тенк организации. Тоа што е заедничко за нив е што се самокритични, знаат да детектираат проблем во сопствените редови, да тргнат најпрво од себе и преку свој личен пример да докажат дека е можна промена. Сметам дека тој тип на mindset (начин на размислување) навистина ни недостасува на нас, како општество, во секоја област. Да избегаме од некои замислени ѕидови и предрасуди и промената да ја почнеме од себе.
(А.В)