Серхио Перез смета дека сезона без Формула 1 тркање за неговиот поранешен колега, Естебан Окон, дефинитивно ќе му наштети многу повеќе одошто ќе му донесе корист.
Французинот годинава ќе ја мине како резервен, развоен и тест возач на Мерцедес, откако и покрај фантастичните перформанси лани, не успеа да најде место на гридот. Првично требаше да потпише за Рено, но французите се решија за Рикардо. Потоа Лоренс Строл ја превзема Форс Индија, така што Естебан стана прекуброен и таму, а поради соработката со Мерцедес, нити Мекларен и Торо Росо не беа подготвени да го земат кај себе.
„ДЕФИНИТИВНО, ДЕФИНИТИВНО ОТСУСТВОТО ЌЕ МУ ШТЕТИ МНОГУ ПОВЕЌЕ ОДОШТО ЌЕ МУ КОРИСТИ. ФОРМУЛА 1 МНОГУ НАПРЕДНУВА СЕКОЈА СЛЕДНА ГОДИНА И НИКОЈ НЕ ЗНАЕ ШТО НОСИ ИДНИНАТА.
ТОЈ Е ВО ОДЛИЧНА ПОЗИЦИЈА СО МЕРЦЕДЕС, НО ЗАСЛУЖУВА МЕСТО НА ГРИДОТ СЕКОЈА ГОДИНА ЗАТОА ШТО Е ЕДЕН ОД НАЈДОБРИТЕ.
НО, ГОДИНА НАДВОР ОД СЕРИЈАТА МОЖЕ ДА ПРОМЕНИ МНОГУ, МОЖЕБИ ЌЕ СЕ ВРАТИ И ЌЕ ВОЗИ ЗА ФАБРИЧКИОТ ТИМ НА МЕРЦЕДЕС, НЕ СЕ ЗНАЕ. СЕПАК, ПОТЕГОТ Е РИЗИЧЕН“, СМЕТА ЧЕКО ПЕРЕЗ.
Перез и Окон минаа две сезони заедно во Форс Индија, а нивната соработка често беше проследувана со инциданти и судари на патеката. Во 2017 година дури добија и забрана од тимот да се тркаат поради сударот во Белгија кој го чинеше тимот многу поени.
Серхио во својата кариера има возено и со првакот од 2009 година, Џенсон Батон како и со сегашниот возач на Рено, Нико Хулкенберг, смета дека Естебан треба да биде позрел.
„СИТЕ МОИ КОЛЕГИ ГИ ЦЕНАМ И РАНГИРАМ ВИСОКО. НО, СИТЕ СЕ РАЗЛИЧНИ, ИАКО НАЈМНОГУ ГО ЦЕНАМ ХУЛКЕНБЕРГ, НО БЛИСКУ Е И ЕСТЕБАН. МИСЛАМ ДЕКА НА ОКОН СЕУШТЕ МУ ФАЛИ ДОЗА НА ЗРЕЛОСТ, НО ТОА ЌЕ ДОЈДЕ СО ТЕК НА ВРЕМЕ“.
