Силен земјотрес го погоди Ломбок, Индонезија каде речиси 400 лица загинаа, а копното на островот се подигна за 25 сантиметри, соопштуваат научниците.
Според најновите податоци на националната агенција за ублажување на катастрофата, во земјотресот загинаа 387 луѓе.
Спасувачките екипи сепак и понатаму продолжуваат со потрагата за да се осигураат дали има уште луѓе затрупани под рушевините.
Научниците на НАСА и Институтот за технологија на Калифорнија на основа на сателитските снимки од Ломбок, направени после земјотресот на 5 август воочиле промени на површината на островот.
Во северозападниот дел на островот, во близина на епицентарот, површината на копното е подигната за 25 сантиметри, додека на другите места паднала за 5 до 15 сантиметри.
Околу 339.000 луѓе, што е 10 % од популацијата на Ломбок, останале без домови, додека уништени се околу 68.000 домови.
