Охриѓанец вработен во „Композитна опрема“ лажно се претставил како управител на фирмата и продал стока во вредност од најмалку 7,8 милиони денари, а парите ги зел за себе, информираше МВР.
Надворешната канцеларија за криминалистички работи Прилеп до Основното јавно обвинителство поднесе кривична пријава против Т. Д (46) од село Велгошти, вработен во „Композитна Опрема ДООЕЛ Прилеп“, заради постоење на основи на сомневање за сторени кривични дела лажно претставување како и фалсификување исправа.
Осомничениот со намера за себе и за друг да прибави противправна имотна корист, лажно прикажал односно се претставил дека е управител на фирмата и во такво лажно својство склучил два писмени договори со фирмата „Ројал Логистик Интернационал Скопје“. Предмет на договор била купопродажба на 1.300 транспортни торби и 630 конфекциски елеци со додатоци со што прибавил за себе, а на штета на фирмата, сума од 7.833.375 денари, a дополнително ќе се утврди штета за вториот договор.
Според полицијата, лицето И.С., поранешен управител на фирмата „Композитна Опрема ДООЕЛ Прилеп“ до 31.10.2017, истиот ден поднел неотповиклива оставка која на ден 05.12.2017 била внесена и спроведена во Централен Регистер на РМ со Решение ,а притоа доставил писмено барање со кое бара стечајниот управник да донесе одлука за промена на управител на фирмата и да го именува пријавениот Т.Д за управител.
И.С исто така на ден 06.09.2017 во својство на управител на фирмата донесол Одлука со која го овластил пријавениот, да ги презема сите активности во име и за сметка на фирмата за период од 11.09.2017 до 13.10.2017, и во таа одлука било предвидено И.С да ги врати печатот и штембилот од Друштвото и истите да ги задолжи пријавениот. И покрај барањето, Управител на фирмата бил назнечен дури на 03.05.2018 година.
Kонстатирано e дека Т.Д. во својство на Управител на фирмата „Ројал Логистик Интернационал ДООЕЛ Скопје“ никогаш не склучил купопродажни договори со „Композитна Опрема Прилеп“. Во моментот на склучување на договорите т.е на 01.12.2017 и 20.12.2017г. сопственик и управител на споменатата фирма било лицето В.Д– син на пријавениот, што укажува на сомнение дека се работи за фалсификуван потпис односно за изработка на исправа со невистинита содржина.
Меѓу останатото, фирмата „Ројал Логистик Интернационал Скопје“ не е регистрирана за производствена дејност, туку приоритетна дејност и е трговија на големо со делови и прибор за моторни возила и поправка на останата опрема т.е наместо да ги изработи, фирмата извршила набавка од трговската мрежа (увоз од странство преку царински склад), а не ги изработила преметите на договорот. Исто така, вредноста на увезените предмети по договорите пријавениот повеќекратно во зголемен износ ја фактурирал на сметка на фирмата во која е вработен, а за која лажно се претставувал дека е управител, со што се стекнал со противправна имотна корист, а на штета на „Композитна Опрема ДООЕЛ Прилеп“. Причинетата штета се однесува и на фактот што фирмата „Композитна Опрема ДООЕЛ Прилеп“ е овластен увозник и нема никаква потреба од набавки преку вакви фирми како посредници.
