Во белградската Палата Србија вечерва ќе биде одржана свеченост по повод инаугурацијата на новиот претседател на Србија, Александар Вучиќ. На инаугурацијата своето присуство го најавија шефовите на држави и влади од регионот, од Европа и светот. Според српските медиуми, Вучиќ ќе биде домаќин на околу 5.000 луѓе.
В четврток, во Белград допатувале претседателот на Словенија, Борут Пахор, српскиот член на претседателството на БиХ Младен Иваниќ, потпретседателот на руската влада Дмитри Рогозин и потпретседателот на сталниот комитет на Секинескиот конгрес Џи Бингсјуен.
Денеска во српската престолнина ќе пристигнат македонскиот претседател Ѓорѓе Иванов, претседателката на Хрватска Колинда Грабар-Китаровиќ, претседателот на Република Српска Милорад Додик и премиерката Жеља Цијановиќ, претседателот на Црна Гора Филип Вујановиќ, босанскиот член на претседателството на БиХ, Бакир Изетбеговиќ.
На инаугурацијата ќе бидат присутни и австрискиот канцелар и шефот на дипломатијата Кристијан Керн и Себастијан Курц, унгарскиот премиер Виктор Орбан, бугарскиот потпретседател и претставник на романската држава, како и претставник на Белорусија.
Брисел потврди дека на свеченоста ќе биде присутен комесарот за проширување Јоханес Хан.
Под покривот на Палата Србија заедно ќе се најдат и претставниците на НАТО и ОДКБ. Алијансата ќе ја претставува Роуз Готемилер, прв заменик на генералниот секретар, а претставник на ОДКБ ќе биде генералниот секретар на организацијата Јуриј Хачантуров.
Во делегацијата на САД, која ја именуваше претседателот Доналд Трамп, ќе бидат помошникот државен секретар за Европа и евроазија Брајан Хој Ји, а во делегацијата ќе бидат и американскиот амбасадор во Србија Кајли Скот и директорот за Балкан, Црно Море и Кавказ во Советот за национална безбедност Марк Тарвакоски.
Свечената инаугурација на Александар Вучиќ во Палатата Србија ќе почне во 18 часот.
